2025 йил 28 июнь куни Бўстонлиқ туманидаги “Олмос” дам олиш масканида “Биз биргамиз!” ижтимоий лойиҳаси доирасида 7—17 ёшдаги ногиронлиги бўлган болалар ўртасида “Мафтункор ранглар жилоси – 2025” номли республика танлови бўлиб ўтди. Тадбир илиқ ва илҳомлантирувчи муҳитда ўтди. Танлов доирасида расм чизиш беллашувлари, санъат кўргазмаси ҳамда шахмат мусобақалари ташкил этилди.
Лойиҳа Ўзбекистон Республикаси Адлия вазирлиги ташаббуси билан, Ўзбекистон Республикаси Олий Мажлиси ҳузуридаги Жамоат фонди, Ўзбекистон Ногиронлар жамияти ҳамкорлигида ва Мираброр Усмонов номидаги Халқаро хайрия жамоат фондининг кўмагида амалга оширилди.
Мусобақада иштирок этган ҳар бир бола ғолиб сифатида эътироф этилди. Уларнинг ҳар бирига тантанали равишда ноутбук ва дипломлар топширилди. Шунингдек, болалар ва уларнинг ота-оналари учун байрам концерти ва ҳашаматли дастурхон ҳам ташкил этилди.
Шу куни Ўзбекистон Республикаси Адлия вазирлиги ҳамда Мираброр Усмонов номидаги Халқаро хайрия жамоат фонди ўртасида кам таъминланган ва ижтимоий ҳимояга муҳтож аҳолини қўллаб-қувватлаш мақсадида ҳамкорлик тўғрисидаги меморандум имзоланди.
Таъкидлаш жоизки, Мираброр Усмонов номидаги Халқаро хайрия жамоат фонди нафақат ногиронлиги ва оғир хасталиги бўлган, кам таъминланган оилалар фарзандларига ёрдам кўрсатиб келмоқда, балки кенг қамровли хайрли лойиҳаларда ҳам фаол иштирок этмоқда.
